Juan Kalparsoro EAEko fiskal nagusiak adierazi du ez legokeela "gaizki" Espainiako Gobernuak gaurko espetxe politikan "malgutasun handixeagoa" erakutsiko balu. Haren arabera, egungo egoera politikoa aintzat hartuta, legediari jarraituz eta "biktimekiko umiliaziorik eragin gabe", euskal presoekin "neurri humanoagoak" hartu beharko lituzkete.
"Errealitatera egokitu behar du kartzela politikak, eta gaurko egoerara egokitu daitezkeen kasu batzuk egon daitezke", esan du Kalparsorok Gasteizen, Bakartxo Tejeria Eusko Legebiltzarreko presidentearekin bildu ostean.
EAEko fiskal nagusiak uste du presoekin ez dela hartu behar erabaki kolektiborik, baizik eta bana-banakoak.
