EAEn neurri ekonomikoak ezartzean "koordinazioa eta adostasuna" lortzeko bildu dira EAJ eta PP

EAJ eta PP, batik bat, Espainiako Gobernuak eta Eusko Jaurlaritzak hartutako neurri ekonomikoei buruz aritu dira gaur bien arteko bileran, eurek esan dutenez. Iñigo Urkullu EAJko Euzkadi Buru Batzarreko presidenteak adierazi du EAEn neurriak Jaurlaritzaren, aldundien eta udalen artean "ahal den koordinatuen" ezarri beharko lirateekela eta, hala, politika publikoen kontseilua sortzeko proposamena egin du.

Antonio Basagoiti EAEko PPko presidenteak ere garrantzia eman dio neurri ekonomikoen inguruan "ahalik eta adostasun handiena" izateari, eta aldundien eta udalen zeregina azpimarratu du.

9:30ean hasi dute batzarra, Bilbon, PPren egoitzan, eta ordu eta erdiz egon dira. EAJtik Andoni Ortuzar Bizkaiko Buru Batzarreko presidentea ere izan da.

Egibarrek garrantzia kendu nahi izan dio EAJ-PP bilerari

Urkulluk eta Basagoitik euren arteko lehen bilera ofiziala egin duten arren, Joseba Egibar EAJko Gipuzkoako Buru Batzarreko buruak garrantzia kendu nahi izan dio batzarrari. "Normaltasunaren barruan sartu behar da". Halaber, Egibarrek gogoratu du PPk PSE-EErekin duela akordioa EAEn -Patxi Lopez sozialistak horri esker lortu zuen iaz Eusko Jaurlaritzako lehendakaritza-, eta hitzarmen hori zabaltzen saiatuko direla hurrengo urteko hauteskundeetan, "abertzaleak kendu eta euskal hauteskunde mapa kontrolatzeko".

"Formak aldatu egin ditu PPk, baina bere estrategia politikoa lehengo bera da", adierazi du Egibarrek gaur goizean Radio Euskadin.