Arabako akordioaren berri atzo eman ostean, EAJk eta Hamaikabatek (H1!) gaur zehaztu dute herrialdean non aurkeztuko diren elkarrekin maiatzaren 22ko hauteskundeetan: batzar nagusietan eta zazpi herritan -Agurain, Kanpezu, Oion, Guardia, Eltziego, Zuia eta Zigoitian-. H1!-eko kideak EAJko zerrendetan joango dira, independente gisa.
Astelehenean bukatuko da zerrendak aurkezteko epea, eta bi alderdiek esan dute balitekeela Arabako beste herri batzuetan ere adostasunera heltzea.
Gasteizen H1!-ek ez du zerrendarik aterako, eta programari buruzko akordioa lortu dute EAJk eta biek.
Bi alderdiotako Arabako presidenteek eman dute hitzarmenaren berri prentsaurrekoan, gaur: Iñaki Gerenabarrena EAJkoak eta Iñaki Beraza Hamaikabatekoak. "Abertzaletasun historiko eta instituzionalaren artikulazioa" bilatu dute, esan dutenez, "lidergo politikoa eta soziala berreskuratzeko".
Gipuzkoan eta Bizkaian akordiorik ez
EAJk duela hilabete batzuk Arabako akordio horren eskaintza bera proposatu zion Hamaikabati EAE osorako —EAJ Nafarroan NaBai 2011 koalizioan aurkeztuko da—. Gipuzkoako H1!-ek baztertu egin du aukera, herrialde horretan besteetan baino indar handiagoa duela iritzita. Iñaki Galdos eta Pello Gonzalez dira Hamaikabateko buru nagusietakoak Gipuzkoan, eta biak legealdi honetan herrialdeko diputatu dira. 2007ko bozetan, baina, EAtik aurkeztu ziren —gero sortu zen H1!—.
Duela lau urteko bozetan Araban gauzak oso estu joan ziren: PPk irabazi zituen, 39.765 botorekin; PSE-EEk 39.596 bildu zituen, EAJk 39.055. EA bere kasa aurkeztu zen: 8.692 boto. Hirugarren geratu arren, EAJk lortu zuen ahaldun nagusi postua —Xabier Agirre—, EAren babesari esker.
