EAJko eta EH Bilduko hainbat ordezkari donostiarrek adierazpen bat aurkeztu dute, Gipuzkoako hiriburuan egin duten agerraldian. Bertan izan dira Andoni Etxebeste eta Idoia Elorza EAJren Gipuzkoa Buru Batzarreko kideak, Arkaitz Rodriguez Sortuko idazkari nagusia eta Reyes Karrere EH Bilduren Donostiako alkategaia. Adierazpena irakurri dute Maria Jesus Idoeta EAJko kideak eta Olaia Duarte EH Bildukoak.
Bi alderdiek defendatu dute galdeketa deseinatu eta antolatzeko prozesuak "bizikidetzan sakontzea" ahalbidetu duela eta galdeketa bera "donostiarren arteko topagune" bilakatu dela. "Gizarte kohesiorako tresna hau begi onez ikusten dugu, eta, horregatik, epe luzeko bizikidetza sustatzen duten dinamikak babesten segiko dugu aurrerantzean ere", adierazi dute.
Azaldu dutenez, galdeketak donostiarrei lagunduko die nolako Euskal Herria nahi duten eta etorkizun hori nola erabaki nahi duten irudikatzen.
EAJk eta EH Bilduk igandean Donostiak egingo den galdeketan parte hartzera animatu dituzte herritarrak. Nahi al duzu euskal herritarrok gure etorkizun politikoa geure kabuz eta aske erabakitzea? galderari erantzuteko aukera izango dute donostiarrek.
Egun berean, galdeketak egingo dituzte Irunen (Gipuzkoa) eta Enkarterriko (Bizkaia) hiru herritan: Alonsotegin, Zallan eta Balmasedan.
[#ZUZENEKOA] Agerraldi bateratua egiten ari dira EAJ eta EH Bildu alderdietako kideak. https://t.co/RWu4g4iL00
— Donostia Galdeketa (@GureEskuDagoDon) 2018(e)ko azaroaren 16(a)
