Lau hautetsontzi kokatu dituzte, Usansolo, Katalunia, Eskozia eta Igeldoko galdeketak irudikatuz. Azaldu dute lehen hirurak txalotu dituela EAJk baina bestelako jarrera azaldu duela Igeldokoaren inguruan.
"Duela urtebete legezko kontsulta bat egin genuen; %72 herritarrek hartu zuten parte, eta %61k bozkatu zuten udalerri izatearen alde", esan du Jose Ignacio Galparsoro Itxas Aurreko bozeramaileak, eta gogorarazi EAJk auzitara eraman duela galdeketa hori.
Alde horretatik, salatu du hogei urte daramatzatela "epaitegietan dirua xahutzen eskubidea dena defendatzeko".
Igeldon herri galdeketa egin zuten 2013ko azaroaren 10ean, eta bozen %61 izan ziren desanexioaren aldekoak; %36, berriz, aurkakoak. Gipuzkoako Foru Aldundiak dekretu bidez onartu zuen desanexioa, baina ez zen gauzatu, Donostiako Udaleko oposizioko alderdiek helegitea jarri eta epaitegiek gibelera bota baitzuten aldundiaren erabakia. EAJren ustez, aldundiak dekretua kendu beharko luke, eta horren ondotik zabaldu beharko litzateke erabakitze prozesua, Donostiako Udalak bultzatuta.
