Iñigo Urkullu EAJko EBBren presidente eta lehendakarigaiak Espainiako Senatuaren eta Gobernuaren Ordezkaritzak kentzea, Espainiako Segurtasun Indarrak Euskal Autonomi Erkidegoak bereganatu dituen eskumenetara egokitzea eta Armada, Barne Ministerioa eta Errege Etxearen aurrekontua murriztea proposatu ditu. Helburua Estatuaren egitura "arintzea" dela esan du.
EAJko karguek bilera egin dute gaur Sabin Etxean, Bilbon; egungo egoera ekonomikoa eta murrizketa planaren ondorioak aztertzeko. Urkulluk zentralismo politiko eta instituzionalerako egin nahi den itzulera "onartezina" salatu du.
"Zorpetzeko eragiketa berriak" berehala amaitzea, nork bere burua "zuritzeko eta goratzeko" publizitate gastu politika berehala amaitzea eta Kontzertu Ekonomikoaren Batzorde Mistoa berehala deitzea ere proposatu ditu EAJko buruak .
Bestalde, alderdikideei euren soldata neurri batean murrizteko "borondatezko konpromisoa" hartzeko eskatu die Urkulluk. Gainera, BEZaren igoera kritikatu du, kontsumoa zigortu eta erosteko ahalmena gutxituko dituelako.
