Itxaso Atutxari Euskadi Irratian egin diote elkarrizketa, eta bertan aitortu du Euskal Autonomia Erkidegoko aurrekontu proiektua ezagutarazi ondoren alderdien aldetik izandako aurreneko erreakzioak ez direla "oso gozoak" izan. Hala ere, ez du espero osoko zuzenketarik, eta ohartarazi du alderdiek abstentziora jotzea nahikoa izan daitekeela aurrekontuak onartzeko.
Atutxak oroitarazi du EAJk akordioak erdietsi dituela PPrekin Arabako eta Bizkaiko aurrekontuek aurrera egin zezaten, eta PSE-EErekin ere ados jarri dela; Maite Iturbe EITBko zuzendari izendatzeko, kasu. EH Bildu "bere rola" betetzen ari dela esan du Atutxak, "EAJren alternatiba izateko nahian". Koalizioarekin ikusten du BBBko presidenteak zailtasun gehien ados jartzeko.
