Akordio hori hartu du hizpide Patxi Lopez lehendakariak ere Eusko Legebiltzarrean, Ezker Batuak horri buruz galdetuta. Esan du pozik dagoela akordioarekin, etaaurrekontuak EAJ-PSOE akordioari esker egongo direla. «Kritikak entzuten ditut, baina ez dut inor entzuten esaten zer gertatuko litzatekeen lehengo asteartean Espainia aurrekonturik gabe geratu izan balitz. Hondamendia izango zen denontzat, baita Euskadirentzat ere». Eta EAJri ongietorria eman zion, «Estatua garatu nahi dutenen klubean» egoteagatik. Mikel Arana EBko koordinatzaileak egindako galderari erantzun zion Lopezek. EBk kritikatu egin du Lege Organiko batean esku hartzeko zeuden eskumenak trukerako txanpon bihurtu izana aurrekontuen negoziazioan. Eta, gainera, jarraipen batzordean EAJ eta Espainiako Gobernua egongo dira, eta Eusko Jaurlaritzak parte-hartzerik ez izatea salatu du.
Eusko Alkartasuneko Juanjo Agirrezabalaren iritziz, EAJ PSOErekin hitzarmena lortu eta gero «autonomismoan ezarri da, eta lurperatu egin du Ibarretxeren Estatutu Politiko Berria».
Agirrezabalak gogora ekarri du EAJk duela gutxi esan zuela «Estatutuaren janzkia txikia» geratu zitzaiela. EA beste jokaleku bati begira lanean ari dela berretsi zuen. «Lanean ari gara ideia guztiak aurkeztu eta burutan atera daitezkeen jokaleku baten alde». Eta EAJri eskatu zion subiranismoaren bidean elkarlanean aritzeko aukeraz baliatzeko, «gatazka politikoa konpontzea zailtzen duen eredu autonomistari eusten jarraitu ordez».
