EAk eta Herritarron Garaia plataformak Nafarroarako sortuko duten hauteskunde eskaintzari "lekukoa" hartu diote gaur EAk eta Alternatibak, eta bozetarako eskaintza hura Hego Euskal Herri osorako sortzeko lan egingo dutela esan dute. Horrela, "pertsona guztien eskubideak errespetatuko dituen Euskal Herriagatik borrokatzeko erantzun sendoa eta baterakoia" emango dutelakoan daude, azpimarratu dutenez.
Pello Urizar EAko idazkari nagusiak eta Oskar Matute Alternatibako bozeramaileak bilera bat egin dute Bilbon, eta jakinarazi dute "eremu denetako ezkerreko subiranistekin harremanak" egingo dituztela datozen egunetan, hauteskunde eskaintza "ahal den zabalena" izateko. "Sigletatik haratagoko" mugimendua eratu nahi dute, "betorik eta bazterkeriarik gabekoa". Maiatzaren 22an izango dira udal eta foru bozak.
Euskal Herrian "aldaketa politikoa eta soziala" sustatuko dutela esan dute Urizarrek eta Matutek, eta, horretarako, "bide politikoak, baketsuak eta demokratikoak" erabiliko dituztela.
