Pello Urizar EAko idazkari nagusiak aurreratu du Patxi Lopez Eusko Jaurlaritzako lehendakariak ETAren amaieraren inguruan egingo duen proposamenari "oztopoak" jarriko dizkiola, akordioa Eusko Legebiltzarrera mugatzen badu. Horretan ezker abertzalearen ordezkaritza ez dagoela gogorarazi du Urizarrek.
Hala ere, Lopezek proposamena zehaztu arte itxarongo duela azaldu du. Urizarren arabera, lehendakariak badaki Madrilen lortutako akordioa ez dela baliagarria EAErentzat, "herren" geratzen baita.
Lopezek bakegintzarako ekimen berriak proposatuko dituela adierazi du gaur; pasa den asteartean Espainiako Kongresuan hitzartu zuten ETAren amaieraren inguruko testua.
Urkulluk dio ezker abertzaleak "hitzetatik ekintzetara" igaro beharko lukeela
Iñigo Urkullu EAJko EBBko presidenteak uste dut ezker abertzaleak "hitzetatik ekintzetara" pasa beharko lukeela igandean kaleratuko duen agiriaren ondotik, eta ezker abertzalearen "autokritika sakon" baten beharra azpimarratu du, "bake iraunkorra lortzeko duen asmoaren barruan".
Haren arabera, ezker abertzaleak "kapitulu bat" eskaini beharko lieke ETAren biktimei, horiek adierazpen baten barruan "ezkutatzen" saiatu ordez. Horrekin batera "Izua eragin dutenen aldetik bereizteko" eskatu dio, baita erakunde armatuari "alden dadin" eska diezaiola ere.
"Biktima guztien eta askotariko biktimen inguruan hitz egin daiteke, baina batzuen inguruan premisa etikoen arabera hitz egin behar da", gaineratu du.
Urkulluk esan du "batzuk" ezker abertzaleak pausoak ematearen aldeko pausoak ematen ari direla, hark "pasatzeko eremu errazagoa izan" dezan.
Aresek espero du ezker abertzaleak ETAri "ordainik gabe" desegiteko eskatzea
Rodolfo Ares Eusko Jaurlaritzako bozeramaileak espero du ezker abertzaleak ETAri "ordainik gabe" desegiteko eskatzea igande honetan Donostiako Kursaleean egingo duten ekitaldian. Aresek "literatura, antzerki eta bitariko adierazpenak" uzteko eskatu dio ezker abertzaleari eta "argi" adierazteko "akatsa izan zela ETAri babesa ematea". Aresek adierazi du ezker abertzaleak aurkeztuko duen testuak ez lukeela "errua banatu behar" ez eta "parekatze eta zuribide onartezinik" egin.
Donostiako ekitaldia
Ezker abertzaleak esan du igande honetan Donostiako Kursaalean egingo duen ekitaldian «borondate osoa» agertuko duela «bake justu eta iraunkorreko agertokia lortzeko». Publiko egingo duten adierazpena «urrats berria» izango da Aieteko adierazpenean marraztutako bide orrian, eta prozesu demokratikoa sendotzeko balio izango du, haien hitzetan. Adierazpen horrek bost ardatz izango ditu, eta «etorkizunean guztiok garaile izateko agertoki demokratikoaren eraikuntzan» ekarpena izango da. Halaber, azpimarratu dute aro politiko berriak «osotasunezko erantzunak» ematea eskatzen duela, eta eragile politiko guztiak konponbide demokratikoaren aldeko «eragile proaktibo» izatea.
