EAk Bilboko Juan Ajuriagerra kalean duen Alkartetxeko taberna itxi egin dute udaltzainek, kokaina trafikoa leporatuta. Bertako arduraduna —M.L.L. 39 urteko emakumea—, atxilotu egin dute, gainera. Udaltzaingoak jakinarazi duenez, "oso purutasun altuko" kokaina saltzen zuen. Ohiko bezeroak zituen, eta horiek "neurriz kanpoko" diru kopuruak ordaintzen zituzten drogagatik.
EAk erantzukizun oro saihestu nahi izan du ohar baten bidez. Azpimarratu du emakumea lokalaren maizterra dela eta ez duela beste inolako loturarik alderdiarekin. Gainera, hari leporatzen dizkioten delituak egia balira, kasua justizia bidean jarriko duela erantsi du. Udaltzaingoarekin elkarlanean aritzeko borondatea erakutsi du, "auzia lehenbailehen konpon dadin".
