EBko 27 afiliatuk koalizioa utzi dute, zuzendaritzarekin ados ez daudelako

Ezker Batuko (EB) 27 afiliatuk koalizioa uztea erabaki dute, gaur gutun baten bidez esan dutenez, ez daudelako Javier Madrazo koordinatzailearen eta zuzendaritzaren politikarekin ados. EBk, haien arabera, "boterearekiko menpekotasuna" dauka, eta "lehen taktikoa zena, obsesio bihurtu da". EB Eusko jaurlaritzako gobernuan EAJrekin eta EArekin dagoela-eta egin dute kritika hori 27 kide horiek. "EAJren politika liberal eta kontserbadorearen aurrean isilik" egotea leporatu diote Madrazoren taldeari.

EB koalizio barruko funtzionamendua ere kritikatu dituzte, "zulatuta" dagoela uste baitute, eta zuzendaritzak bere inguruko jendea Jaurlaritzan "entxufismoz" sartzen duela gaitzetsi dute.

Hala, Ezker Batua "noraezean" ikusten dute, "eta ez herritarren beharrak erantzuteko moduan".

EBk maiatzaren 31n eta ekainaren 1ean egin zuen batzarra, eta Javier Madrazo eta honen taldea %70 inguruko babesarekin hautatu zituzten zuzendaritzarako. Hamahiru urte daramatza Madrazok koordinatzaile postuan.