Gaur 82 urte, Espainiako Errepublikaren aurkako estatu kolpea hasi zuten. Iragana gogoan, Araba berria eraiki lelopean, gertaera hori gogora ekarri dute dozenaka pertsonak, baita horren ondoriozko gerra eta diktadura salatu ere. Elkarretaratzean egia, justizia eta erreparazioa eskatu dute. "Txilek Victor Jara hil zuten militarrak zigortu ditu, baina Espainiako Estatuan Lauaxeta hil zutenak zigorrik gabe daude".
EH Bilduk, Ahal Dugu-k, Ezker Anitzak eta Equok deitu dute ekitaldira, eta Frankismoaren Krimenen Aurkako Kereilaren Euskal Plataformaren babesa ere jaso du. Alderdi horietako ordezkariek manifestu bat irakurri dute, non egia, justizia eta erreparazioa eskatu baituten, baita hori erdiesteko baliabide publikoak bideratzea ere.
Frankismoaren Krimenen Aurkako Kereilaren Euskal Plataformak aitortu du “zigorgabetasuna” salatzeko ekinbideen balioa. Halaber, gaineratu du “justizia” eskaeren bitartez lortuko dela Espainiako Gobernua behartzea nazioarteko araudia betetzera, eta Europako Parlamentuak eta Nazio Batuen Erakundeak egindako eskaerak aintzat hartzera.
