Eusko Jaurlaritzak antolatutako Oroimenari eta Bizikidetzari Buruzko Biltzarra "baztertzailea" dela salatu du gaur Egiari Zor fundazioak, alde bateko testigantzak baino ez dituztelakoan jasoko. Bilbon izango da kongresua, gaurtik igandera bitartean, eta, batez ere, ETAren biktimak bilduko dira.
Fundazioak dio "indarkeria instituzionala" pairatu izan duten "milaka lagunen" senideek ez dutela aukerarik izango bilkuran parte hartzeko, eta jakinarazi du antolatzaileak ez direla joan harengana. Espainiako eta Frantziako estatuen "indarkeriaren" ondorioz kalteturiko pertsonak biltzen ditu Egiari Zor fundazioak.
"Egitasmo horren intentzionalitate politikoa gaitzetsi nahi dugu", esan du. Biktima guztien parte hartzea ezinbestekotzat jo du, "bizikidetza izateko esparru demokratikoa lortzeko helburuarekin".
Oroimenari eta Bizikidetzari Buruzko Biltzarrean "Euskadin bakea, askatasuna eta bizikidetza egonkortzeko biktima guztien testigantzak eta proposamenak" jasoko dituzte, Jaurlaritzako Herrizaingo Sailaren arabera. Azkeneko egunean Jorge Fernandez Diaz Espainiako Gobernuko Barne ministroak parte hartuko du.
Gaur, hasiera ekitaldian, Patxi Lopez Jaurlaritzako lehendakaria izan da. "Biltzar honen helburua da bizikidetza berri baterako oinarriak ezartzea. Etorkizuna egiten hasteko bakoitzak bere iraganaren erantzukizuna hartu behar du", esan du.
