Badira 234 egun Hodei Egiluz gazte bizkaitarra desagertu zela. Ordutik zabalik jarraitzen du ikerketak, baina motel doa. Hori dela eta, haren gertukoek webgune berezia jarri dute martxan Deustuko Unibertsitatearen laguntzarekin, www.hodei-missing.com, hari buruzko informazioa zabaldu eta haren berri jasotzeko asmoz. Webgunea bihar aurkeztuko dute ofizialki, baina jadanik martxan dago.
Anberes erdialdean ikusi zuten azkenengoz 23 urteko gaztea, goizaldean. Lekukoen arabera, "ikaratuta" zegoen, eta atzera begiratzen zuen etengabe. Egiluzek laguntza eskatu omen zien, eta haiek Poliziari deitzea eskaini zioten, baina hark ezetz esan zien.
