'Egunkaria libre!' aldarrikatu dute hainbat lagunek Iruñean

Maiorga Ramirez (EA), Maria Luisa Mangado (NaBai), Aritz Romeo (NaBai), Aitor Etxarri (NaBai), Santi Kiroga (Uharteko Udaleko EAE-ANVren zinegotzia), Marije Pueyo (Iruñeko Udaleko EAE-ANVko zinegotzia), Xabier Letona (Argiako zuzendaria), Oskar Zapata (Topagunea Euskara Elkarteen Federazioko Nafarroako arduraduna), Bixente Serrano Izko (idazlea), Iñigo Aranbarri (idazlea), Aingeru Epaltza (idazlea), Iñaki Lasa (Kontseiluko burua), Josu Txueka (historialaria), Sagrario Aleman (euskaltzain osoa), Nestor Martinez (Sortzen-Ikasbatuazeko Nafarroako koordinatzailea) eta beste hainbat izan dira gaur Iruñean, Egunkaria-ren epaiketaren aurkako elkarretaratzean.

Egunkaria libre! lelopean egin dute bilkura, Udaletxe plazan, 12:00etatik aurrera. Auzipetuak ere bertan izan dira, baita beste hainbat lagun ere; tartean, Iñaki Uria eta Martxelo Otamendi.

Azkeneko asteetan euskal zinemako hainbat lagunek, kirolariek, politikariek, bertsolariek, eta idazleek eta argitaletxeetako ordezkariek egin dituzte auziaren kontrako elkarretaratzeak.

Bost auzipetu

Egunkaria auziko sumario nagusiko epaiketa azaroan da hastekoa -kazetaren itxierarena-, Espainiako Auzitegi Nazionalean, eta Joan Mari Torrealdai, Iñaki Uria, Martxelo Otamendi, Txema Auzmendi eta Xabier Oleaga daude auzipetuta, ETAko kide izatea egotzita. Fiskalak, defentsak bezala, auzia ixteko eskatu zuen. Epaiketaren hasiera eguna jartzeke dago oraindik.

Joan Mari Torrealdai. 14 urteko espetxealdia eta 15 urteko inhabilitazioa eskatu dute haren aurka.

Iñaki Uria. 14 urteko espetxealdia eta 15 urteko inhabilitazioa.

Txema Auzmendi. 14 urteko espetxealdia eta 15 urteko inhabilitazioa.

Martxelo Otamendi. 14 urteko espetxealdia eta 15 urteko inhabilitazioa.

Xabier Oleaga. 12 urteko espetxealdia eta 14 urteko inhabilitazioa (14 urte, AVTren eskaeran).



Egunkaria-ko langile izandakoak epaiketa prestatzen dabiltza, gizartea mobilizatzeko. Herri batzordeak sustatzen ari dira, epaiketarako dirua biltzen, mobilizazioak antolatzen...

=b2003ko otsailaren 20an itxi zuten 'Egunkaria'=b

2003ko otsailaren 20an, Juan del Olmo Espainiako Auzitegi Nazionaleko epailearen aginduz, Guardia Zibilak Egunkaria euskarazko egunkariaren egoitzak itxi eta hamar lagun atxilotu zituen: Joan Mari Torrealdai, Iñaki Uria, Txema Auzmendi, Martxelo Otamendi, Pello Zubiria, Xabier Oleaga, Xabier Alegria, Fermin Lazkano, Luis Goia (2006an hil zen), eta Inma Gomila.

Uriak, Oleagak, Otamendik, Alegriak eta Auzmendik torturak eta tratu txarrak jaso zituztela salatu zuten epailearen aurrean. Seiek jarri zuten salaketa, eta guztiak artxibatuta daude.