‘Egunkaria’-ren eskertza ekitaldia zuzenean BERRIA.INFOn

BERRIA.INFOk zuzenean emango du bihar Egunkaria-ren eskertza ekitaldia. Bilbon izango da, Euskalduna jauregiko areto nagusian, 11:30etik aurrera.

Apirilaren 12an Espainiako Auzitegi Nazionalak absolbitu egin zituen Joan Mari Torrealdai, Iñaki Uria, Txema Auzmendi, Martxelo Otamendi eta Xabier Oleaga Egunkaria-ren itxiera kasuko auzipetuak, eta eskertza ekitaldiaren bitartez auzipetuek urteotan herritarren eta erakundeen aldetik jasotako elkartasuna itzuli egin nahi dute.

Dantzarako, bertsoetarako eta musikarako parada egongo da Euskaldunan domekan. Herri batzordeetako hainbat kidek, Egunkaria-ko langile ohi batek edota Torrealdaik hitzaldiak egingo dituzte, halaber.

Auziari garrantzia webak

BERRIA.INFOk Egunkaria auzia-ri garrantzi handia eman dio, webgune berezia eginda. Esaterako, ia ehun bideo dauzka. Lehengo asteko asteartean, auzipetuen agerraldia zela-eta, ordu eta erdiko zuzenekoa eskaini zuen BERRIAren webak.