Alba Fatuarte EH Bilduko zinegotziak azalpenak eskatu dizkie Asier Abaunza Bilboko Hiri Jasangarritasunaren eta Garapenerako Politiken zinegotziari eta Ines Ibañez de Maeztu Mugikortasun eta Jasangarritasun zinegotziari. Agerraldi bat egitea galdegin die, Zabalgarbi inguruan pilatzen ari diren metal astunen inguruan azalpenak emateko.
Tecnaliak egin eta BERRIAk laburtu duen txostena ekarri du gogora Fatuartek. "Txosten horrek baieztatzen du azken urteetan salatu duguna. Zabalgarbiko inguruan, kutsadura dago artsenikoagatik. Eta, txosten horren arabera, Kobetamendi da kutsatutako lekuetariko bat. Gure ustez, egoera horren aurrean, gobernuak azaldu beharko luke zer-nolako neurriak hartuko dituen", adierazi du.
Ikerketa horren arabera, iazko martxoan kiloko 34 miligramo artseniko topatu zuten Kobetamendiko neurketan. Berez, 30etik gora topatuz gero, umeek jolasteko desegokitzat jotzen dute eremu bat. Horren aurrean udalak zer egiteko asmoa duen jakin nahi du EH Bilduk.
