EH Bilduk modu baikorrean jaso du bihar Bilbon Eusko Jaurlaritzak Araba, Bizkaia eta Gipuzkoako 128 alkateri biktimak oroitzeko ekitaldiak antolatzeko egingo dien gonbidapena. Zehaztu du, ordea, orri txuri bat izatea nahiko lukeela, "erakundeen arteko elkarlanaren bide orria idazteko aukera eskainiko duena". Derrigorrezkotzat jotzen du biktimen aldeko edozein ekimenetan udalek parte hartzea.
Julen Mendoza Errenteriako (Gipuzkoa) alkateak eta Luis Intxauspe Hernaniko (Gipuzkoa) alkateak azaldu dutenez, ekimenak jarraipena izatea nahiko luke koalizioak (EH BIlduren izenean mintzatu dira). Nabarmendu dute, ordea, Jaurlaritzaren ekimen horren lanketan ez dutela parte hartu udalek, eta udalen artean ados jartzea helburua baldin bada, hala egin beharko zela, "hedabideetatik kanpo" eta "zintzo".
EH Bilduk nabarmendu du udalek bakearen eraikuntzan eta egonkortzean, "bereziki adiskidetzean eta elkarbizitzan" duten garrantzia: "Udalaka gara herritarrengandik hurbilen gauden erakundeak, eta era horretara, irekitako zauriak zeintzuk diren bertatik bertara ezagutzen ditugunak".
Zehaztu du, baina, Udal Erretratuak banatzeko ekimenak (horrela izendatu dute) lehen urrats bat izan behar duela "herri honetan gertatu den guztia aitortzeko". Mendozak eta Intxauspek azaldu dute giza eskubideen urraketen hainbat adierazpen izan direla eta horiek guztiak ikertu eta jarri behar direla mahai gainean.
