EH Bilduren Arabako hautagaiak fracking-aren aurka azaldu dira gaur berriro, Gasteizen, eta adierazi dute koalizioa dela gasa ustiatzeko teknika hori geldiarazteko alternatiba bakarra. "Araba izango litzateke fracking teknikak gehien kaltetu dezakeen herrialdea, Arabako zatirik handiena baita potentzialki ustiagarria".
Koalizioak dio energia ereduaren aldaketa beharrezkoa dela eta energia berriztagarrien aldeko apustua egin behar dela. Horretarako, erregai fosilak progresiboki baztertzea defendatzen du eta fracking-a bezalako teknikak ez erabiltzea.
“Fracking-aren atzean EAJ, PSE eta PPren interes ekonomikoak daude", salatu du Belen Arrondo EH Bilduren Arabako zerrendaburuak. "Zinikoa da, kanpainan gaudelako, fracking-aren defentsa sutsua egiten duten horiek, gezurretan eta zurikeriatan aritzea”. Haren arabera, proiektuari buruz anbiguotasunez beteriko mezua darabilte EAJ, PSE eta PPk.
