EAEko Justizia Auzitegi Nagusiak Irungo Udaltzaingo zerbitzurako hamabi lanposturi ezarritako hizkuntza eskakizunak bertan behera uzteko epaia eman zuen, euskara ez dakitenentzako «diskriminatzailea» dela argudiatuta. Harrabotsa sortu zuen erabakiak. Gaur, «euskararen aurka» emandako epai hori gaitzesteko, EH Bilduk, EAJk eta Elkarrekin Podemos-IU alderdiek izenpetutako adierazpen bat irakurri dute Eusko Legebiltzarrean. Salatu dute epaiak zalantzan jar dezakeela sektore publikoan euskararen normalizazioan aurrera egiteko esparru juridikoa. «Kezka» eta «egonezina» agertu dute.
Adierazpenean jaso dutenez, bat egiten dute EAEko herri erakunde guztiek euskara normalizatzeko egiten ari diren «lan eskergarekin», euskarak herritarren egunerokoan «dagokion lekua har dezan» eta herritar guztien hizkuntza eskubideak «bermatzeko».
Irungo Udalari babesa ematen diotela azpimarratu dute: «EAEko herri administrazio orok lanpostu publikoen hizkuntza eskakizunak eta derrigortasunak ezartzeko duen legezko zilegitasuna eta eskumena aitortzen dizkiogu, herritarren hizkuntza eskubideak erdigunean jarrita».
Hala, adierazi dute kezka eragin diela Auzitegi Nagusiaren epaiak, kolokan jar dezakeelako «azken hamarkadetan EAEko sektore publikoan euskararen normalizazioan aurrera egiteko izan dugun marko juridikoa».
