EH Bilduk Eusko Legebiltzarrean dituen 21 ordezkariak osoko bilkuratik joan dira, koalizioak proposatutako ekimenei "zentsura politikoa" egiten dietelakoan. Dani Maeztu legebiltzarkideak salatu du koalizioak proposatutako eztabaidak galarazten ari direla beste alderdiak.
Bi gai gogorarazi ditu Maeztuk; Estefania Beltran de Heredia Eusko Jaurlaritzako Segurtasun sailburuaren eta Jorge Aldekoa Ertzaintzako buru izendatu berriaren agerraldia eskatu zuen EH Bilduk, Iñigo Cabacasen auziaz azalpenak emateko. PSE-EEk eta EAJk "galarazi" zituzten agerraldiak.
Hiriko proiektuaren harira, Iñigo Urkullu Eusko Jaurlaritzako lehendakariaren agerraldia eskatu zuen EH Bilduk, eta "PPren babesarekin" agerraldi hori ez zen onartu, Maezturen esanetan.
Euskaltelen inguruan eztabaidatzen ari zirela egin du kexa Maeztuk, eta gai horretaz jarduteko eskatu dio Bakartxo Tejeria Eusko Legebiltzarreko presidenteak. Hala ez egitekotan, hitza kenduko diola ohartarazi dio. Hori horrela, legebiltzarretik joatea erabaki dute koalizioko ordezkariek.
