Osasunaren aldeko eta errausketaren aurkako martxa egin dute Andoainen, Ipar Haizea herriko taldeak antolatuta. Mobilizazioa Etxeberrieta plazan hasi da 17:00etan, eta Nafarroa plazan amaitu da, ekitaldi batekin.
Errauste plantak minbizia kasuak %3,5 ugaritzen dituela ohartarazi zuen OEIT Osasuna eta Errausketa Ikerketa Taldeak, eta sendagileek bat egin dute Andoaingo mobilizazioarekin. Manifestazio amaierako ekitaldian, Jose Maria Tellon sendagileak hartu du hitza: "Ez dugu Andoain eta inguruko biztanleak etorkizuneko ikerlarien ikerketa gai izan nahi".
Bestalde, astelehenean, Donostiako Koldo Mitxelena kulturunean, errauste plantek pertsonen osasunean eragiten duten arriskua aztertuko dute bost medikuk, 19:00etan. Maialen Berridi, Jose Cruz Villandiego, Jose Luis Paulin, Xabier Mitxelena eta Marta Barandiaran medikuek hitz egingo dute.
