EITB Euskal Irrati Telebista Publikoaren seinalea Nafarroan digitalizatzeaz arduratuko den lantaldeak urtarrilean egingo du aurreneko batzarra, gaur Yolanda Barcina Nafarroako Gobernuko presidenteak jakinarazi duenez. Azaldu du urrats horiek "legearen arabera eta elkarrizketaren bidez" egin behar direla eta, beraz, ez dutela balio "itxurakeriaz eginiko keinuek". Barcinak azaldu du taldea oraindik ez dela batzartu Gabon egunak "oso txarrak" direlako.
Nafarroako Gobernuaren eta Jaurlaritzaren arteko harremanaren balorazio ona egin du Barcinak, eta esan du "lankidetzarik onena" nahi duela "Euskadirekin, Errioxarekin, Aragoirekin eta bizilagun guztiekin".
Seinale analogikoa digitalizatzeko eskatu zion Nafarroako Parlamentuak EITBri urriaren 25ean. EITBk abenduaren 11n jakinarazi zuen kate publikoa Nafarroan ikusgai izango zela aurrerantzean, baina atzera egin zuen hurrengo egunean. Urkulluk eta Barcinak abenduaren 12an adostu zuten lantalde bat osatzea gaia jorratzeko, eta oraindik ez dute bilerarik egin.
