Navarra Directo saioko hogei langileen kontratua bukatu baino hiru egun lehenago EITBk azaldu du programa beste hilabete batez luzatuko duela. Horrela, Navarra Directo 2012ko urtarrilaren 31n bukatuko litzateke.
Egun horretatik aurrera, programaren eta langileen etorkizuna kolokan egongo da. EITBk Navarra Directo-ren aurrekontuari egin nahi dion murrizketa garrantzitsuak langile askoren kaleraketa suposatuko du.
"Langile bezala, mespretxatuta, erabilita eta gutxietsiak sentitzen gara", esan dute saioko beharginek. "Gure lanpostuekin jolasten ari dira, kontratuak inongo azalpenik gabe luzatuz. EITB bezalako enpresa publiko batek ezin du aldi baterako enpresa bat bezala jokatu, hilabetez hilabete kontratuak luzatuz".
Langileek 43.000 sinadura aurkeztu berri dituzte Nafarroako Gobernuan eta Eusko Jaurlaritzan, saioak orain arte bezala izan dezan jarraipena.
