EiTBko Administrazio Kontseiluak onartu du zuzendari nagusiak martxoaren 14ko hauteskundeei begira egindako jarraipen asmoa

Bi telebista kate publikoak –ETB-1 eta ETB-2– eta hiru irrati kateak –Euskadi Irratia, Radio Euskadi eta Radio Vitoria– buru-belarri ariko dira kanpainia osoan, eta baita hauteskunde egunean bertan ere. Eguneroko informazioa albistegietako tarte berezietan sartuko da, baina horrez gainera, elkarrizketak eta eztabaidak izango dira; hauteskunde gauean, berriz, saio bereziak, inkestak, botoen kalkuluak eta behin betiko emaitzak. Duela lau urte ordezkaritza lortu ez zuten indar politikoei edo lehenengoz aurkeztu direnei dagokienez, Euskal Autonomia Erkidegoko hiru lurraldeetan zerrendak aurkeztu dituztenei emango zaie lehentasuna. Gainera, ETBk jarraipen zehatza eta zabala egingo dio kanpainari Nafarroan ere.

Kanpainaren jarraipen informatiboa egiteko erabili diren ardatzak, azken 20 urteotan EiTBk erabili dituenak izan dira, elkarrizketak, eztabaidak, eguneroko tarteak eta doako publizitatea sartuta, beti ere hauteskunde-legediari jarrituz eta aurreko Madrilgo Gorteetarako azken hauteskundeetako emaitzak kontuan izanda.

Horrenbestez, alderdi politikoentzako denboraren banaketa egiteko, doako saioak arautzeko 1991ko apirileko Lege Organikoan ezarritako jarraibideak beteko dira. Horren arabera, botoen %20 baino gehiago lortu zuten alderdiei 3ko koefizientea egokituko zaie; %5etik 20ra bitartean zutenei 2koa, eta botoen %5 baino gutxiago eskatu zutenei 1eko koefizientea. Gainera, hauteskundeetara lehen aldiz aurkezten direnei edo azken hauteskundeetan ordezkaritzarik lortu ez zutenei 1eko koefizientea ezarriko zaie horien artean banatzeko.