Euskadi Irratiko, Radio Euskadiko eta Radio Vitoriako langileak grebara deitu ditu Eusko Irratiko zentro arteko batzordeak, hilaren 24rako, erregulazio espedientearen aurka protesta egiteko. Batzordeak EITBko administrazio kontseiluko kideei eskatu die erregulazio espedientea kentzearen alde bozkatzeko, eta zuzendaritzari exijitzeko lanpostu amortizazioa galaraziko duen akordioa lortzeko langileen ordezkariekin.
ELA sindikatuak nabarmendu du erregulazio espedientea EAJk, EH Bilduk eta LABek EITBko administrazio kontseiluan, "Eusko Ikaskuntzaren eta Euskaltzaindiaren laguntzaz", egin zuten akordio "arrazoigabearen" emaitza dela. ELAk, era berean, administrazio kontseiluari eskatu dio exijitu diezaiola EITBren zuzendaritzari enplegu deialdi publikoa gainditu dutenen postuak betetzeko. "ELAk ez du onartzen lanpostuen adjudikazioa eta erregulazio espedientea elkarrekin lotzea".
