2017ko Araba Euskaraz jaiaren antolatzaileek erabaki dute leloa eta logoa uztartzea. Bastida Ikastolako arduradunek Wow! harridura adierazpena baliatu dute, letra larriz, jaiaren muina laburbiltzeko; halaber, o letraren zuloa zeharkatzen ari den kohete bat marraztu dute. “Harridura adierazi nahi dugu jaiagatik beragatik, eta gogoz gabiltzalako 2017ko aldia antolatzeko”, esan du Ketxu Bedialauneta ikastolako zuzendariak. Koheteak, bestalde, hezkuntza hartzen ari den norabidea irudikatzen duela azaldu du.
Egungo ikastola 1979. urtean sortutakoaren oinordekoa da. Hamar gela ditu, hamahiru irakasle, eta Bastidako zein inguruko herrietako 164 ikasle doaz bertara. Aurrera begirako erronka pedagogiko nagusiak Eki ikas-materialera egokitzea da, eta Haur Hezkuntzako eraikinaren espazioa berriz antolatzea. Hain zuzen ere, esparru pedagogiko berria onartu dute 6 urtera arteko ziklorako, eta horretara egokitu beharko dute.
