"Eztabaida erabaki behar dutenei ukatzen" ari zaiela uste du Marian Beitialarrangoitia EH BIlduko legebiltzarkideak, alegia, Iñigo Urkulluk astearterako deitu duen alderdien mahaia ez dela horretarako gunea, Gasteizko legebiltzarra eta lurraldeetako batzar nagusiak baizik. Ekonomia indarberritzeko eztabaida, gainera, eragile sozial, ekonomiko, sindikal eta politikoetara zabaldu behar dela uste du EH BIlduk, egoeraren larritasunak horixe eskatzen duela.
Defizitaren malgutzeak eragingo lukeen zorpetzeko ahalmena erabili beharko balitz "prest" legokeela esana dauka, baina larrialdi plan batean erabili behar dela berretsi du, ez dela argazkietarako unea edota obra atzeratuak bukatzekoa. "Eredu sozial berri baterako urratsak" egin behar direla eta hori eragile guztien arteko kontua dela.
Krisi ekonomikotik ateratzeko EH BIlduren larrialdi planak lau zutabetan du oinarria. Ezinbestekoa ikusten du, lehenik eta behin, justizia sozialean oinarritutako politika fiskal berria egitea eta, bitartean, zorpetze publikoa erabiltzea. Murrizketa sozialak, bestalde, ez dira krisitik ateratzeko irtenbidea. Horiek moztu eta alternatibak sortu behar direla uste du, eta, azkenik, horiek denak bilduko lituzkeen eredu sozioekonomikoa eraikitzeko eta enplegua sortzeko plan integrala egitea proposatuko dio Urkulluk deitutako mahaiari.
Ezer berriari erreparatu beharrean "betiko errezeta" erabiltzen ari da, ordea, EAJ, EH BIlduk salatu duenez. "Politikak eta ereduak aldatzeko borondaterik ez dutela adierazi dute behin eta berriz, eta Madrilekiko menpekotasuna". Horrekin adierazi du "burujabetza ariketa minimo bat egiteko asmorik ez dutela. [...] Non dago gure politikak eta etorkizuna erabakitzeko eskubidea?".
