ETAk iazko urriaren 20an jakinarazi zuen borroka armatua bukatu zuela, baina Espainia "arduragabe" ari da jokatzen, ELAk gaur salatu duenez. "Badirudi ez daukala egoera berri hau kudeatzeko borondaterik. Onartu ezinekoa da hori".
Euskal presoez, adibidez, "erabateko desinformazioa eta manipulazioa" dagoela iritzi dio ELAk. Haren ustez, "ezinbestekoa da biolentziari uko egitea", baina hori gabe ere presoak hurbil daitezke, eta hirugarren gradua eta baldintzapeko askatasuna eman daitezke. "Ezin da maximo etikorik eta alderdi baten programa politikorik ezarri. Gainera, zuzenbidetik at dago".
EAJren jarrera "ulergaitzagoa" egiten zaio ELAri, hark otsailaren 21ean PP eta PSOErekin-eta Espainiako Kongresuan sinatutako akordioagatik. "Gobernuari legeak zorrotz bete ditzala eskatzen zaio itun horretan. Baina lege horiek hein handi batean indargabetzea ezinbestekoa da, itun antiterroristaren itzalean egindako gehiegikerien ondorioz zeharo kutsatuta baitaude".
Aldiz, ezker abertzalearen Konponbide haizea dabil agiria —biktimei buruzkoa-eta—, "ahalegin politiko eta etiko txalogarria" dela deritzo sindikatuak, "etorkizunean gure herrian abia daitekeen irtenbide eta adiskidetze prozesu baterako biziki osagai interesgarriak biltzen dituelako".
