Jendetza batu da Baionako tren geltokian Pauera zihoazen 21 etorkinak babesteko. Etorkinen kolektiboak jakinarazi duenez, sei hilabete inguru egingo dituzte PRADAk zehaztutako bizilekuetan, eta horren ostean Italiara lekualdatuko dituzte. Ordea, herrialde hartan oso asilo eskaera gutxi onartzen dituzte, eta beraz, litekeena da Baionatik joandakoak Libiara eramatea.
Horiek hala, iheslarien egoera salatzeko elkarretaratzea egin dute goizean tren geltoki parean. Bertan bildutakoek besarkada eta txalo artean agurtu dituzte trena hartzera zihoazenak. Ondoren aurreskua dantzatu diete, eta horren ostean trenera abiatu dira.
Jendea errailetan txaloka, elkartasuna ikaragarria da @berriapic.twitter.com/ykCasbYGCt
— Eihartze Aramendia (@earamendia) 2017(e)ko abenduak 19
Etorkinen kolektiboak salatu duenez, "oso baldintza txarretan" egingo dituzte datozen hilabeteak Paueko zentroan. Dena den, egonaldiaren amaieran, Italiarako lekualdatzearen berri ematen dietenean, etorkinek hiru eguneko epea dute erabakiaren aurkako errekurtsoa jartzeko, eta horretan ari dira lanean kolektiboko kideak. Epaia Paueko administrazio epaitegiak emango du orduan. Bien bitartean, polizia etxera egunean bi aldiz izenpetzera joan beharko dute iheslariek.
