"Elkarrizketa oztopaezina" dela esan du Elkarrik, eta eztabaida foroak osatzearen alde agertu da

Ibarretxe planaren eztabaida prozesuaren azterketa egin du Elkarrik. Hausnarketaren ondoren, diagnostikoa. Satanizazioaren mehatxua hor dagoela esan dute, "eztabaida deuseztu asmoz". Espainiako Gobernuak bide horretan jauzi kualitatiboa eman duela uste du Elkarrik, eta egoera horri erantzuteko bidea elkarrizketa bultzatzea dela esan du. "Zenbat eta traba gehiago, orduan eta beharrezkoagoa da elkarrizketa, eta ahalegin handiagoa egin behar da gizartearen parte hartzea bultzatzeko", esan du Gorka Espiau Elkarriko kideak. Hausnarketaren ondoren, Elkarrik bere konpromisoak eman ditu ezagutzera. Bata, elkarrizketa foroak osatzea eta bestea, gizartearen parte hartze zuzenagoa bultzatzea.

"Ezin zaio probokazioari kasu egin elkarrizketaren printzipioa bertan behera uzteko. Uste dugu testuinguru honetan eztabaida eskubidea baliatuz Elkarrik Eusko Legebiltzarrera eta Nafarroako parlamentura helaraziko duen alderdi poltiko guztien arteko elkarrizketa foroak garrantzia gehiago hartzen duela. Eta uste dugu, elkarrizketa prozesu hau eragoztea ezinezkoa izango dela", azpimarratu du Elkarrik.