Eusko Legebiltzarrerako hauteskundeen emaitzak aztertzeko mahai inguru bat egin du gaur Berria telebistak. 12:00etan hasi da saioa, eta hiru hizlari aritu dira egiten emaitzen balorazioa: Eider Alkorta politologoa, Koldo Ordozgoiti kazetaria eta Igor Ortega soziologoa. Pello Urzelai kazetariak gidatu du azken mahai inguru hori.
Hauteskunde kanpainan hiru mahai inguru egin zituen Berria telebistak, hiru gairen inguruan. Lehenak ekonomia izan zuen hizpide, eta Adrian Zelaia eta Eduardo Malagon izan ziren gonbidatuak. Zelaia Ekai Center politika publikoei buruzko ikerketa zentroko lehendakari exekutiboa da. Malagon, berriz, EHUko ekonomia irakaslea. Mahai ingurua Jakes Goikoetxea kazetariak gidatu zuen.
Bigarrena euskarari eta hizkuntza politikari buruzkoa izan zen, hilaren 16an. Iñaki Petxarroman kazetariak zuzenduta, solasean aritu ziren Paul Bilbao Kontseiluko idazkari nagusia, Mertxe Mugika AEK-ko koordinatzaile nagusia eta Mikel Irizar Topaguneko lehendakaria. Joan den asteazkenean, berriz, subiranotasunaz eztabaidatu zuten Xabier Barandiaran Deustuko Unibertsitateko irakasleak eta Mario Zubiaga EHUko irakasleak, Pello Urzelaik zuzenduta.
