30 urteko gizonezko bat atxilotu dute Gasteizen, goizaldean, emakume bat jo eta haren urte eta erdiko alaba aurreneko pisuko leihotik bota duelakoan. Haurrak gorputzean eta buruan kolpeak dituela azaldu dute osasun zerbitzuek.
Ertzaintzak berri agentziei esan dienez, emakumeak ere jo du gizonezkoa, eta gizonak andrearen urte eta erdiko alaba leihotik bota du. Bikotea istiluka eta builaka aritu dela azaldu dute, baina ez dute zehaztu gertaerak nola izan diren zehazki. Askatasuna kalean gertatu da, 14. zenbakian, 03:40 aldean.
Erietxera eraman dituzte hirurak; gizonezkoa, atxilotuta. Umea Santiago ospitalera eraman dute, baina zauri larriak zituela ikusi eta gero Gurutzetako erietxera eraman dute, Bizkaira. Zaintza Intentsiboen Unitatean daukate.
Amak 18 urte ditu, eta Txagorritxun dago, zauriturik hura ere. Gizonezkoa, berriz, Santiagoko erietxera eraman dute. Ertzaintzaren esanetan, bere burua zauritzen ahalegindu da.
Gertaeren lekua hesituta eduki dute, eta frogak hartzen aritu dira ertzainak.
Gasteizko Plataforma Feministak dagoeneko antolatu du protesta, indarkeria matxista salatzeko. Asteartean egingo dute, 19:30ean, Andre Maria Zuriaren plazan.
