Emakume bati egindako sexu erasoa gaitzetsi dute Orkoiengo herritarrek

Joan den azaroan Orkoiengo (Nafarroa) emakume bati egindako sexu erasoa ikertzen ari da Iruñeko 1. Instrukzio Epaitegia. Erasoarekin lotuta, zazpi gizonezko atxilotzeko agindua eman zuen epaitegiak, eta zazpi horietatik hiru espetxeratu dituzte azkenean. Bertze bi baldintzapean aske gelditu dira. Ikerketaren arabera, zitak egiteko aplikazio baten bitartez jarri ziren erasotzaileak emakumearekin harremanetan, eta harekin gelditu ondoren egin zioten eraso.

Orkoiengo talde feministak deituta, elkarretaratze jendetsua egin dute herrian, Ez beti da ez eta Ez zaude bakarrik lelopean. 300 lagun inguru bildu dira, tartean baita herriko alkatea eta Nafarroako Gobernuko Berdintasun lehendakariordea ere. Gobernuak jakinarazi du auzian pertsonatu eginen dela, gertaera «oso larria» izanik. Idoia Ilundain mugimendu feministako bozeramaileak salatu duenez, «berriro ere gizonezko talde batek bere botere posizioa erabili du emakume bat beldurrarazi, umiliatu, eta hari eraso egiteko».