Herrian izandako eraso matxista baten berri eman du Legorretako Udalak: jakinarazi du bart gauean emakume bati eraso ziotela. Ertzaintzako iturriek BERRIAri azaldu diotenez, 33 urteko gizonezko bat atzeman zuten, bikotekideari eraso egitea leporatuta. Kalean gertatu zen erasoa, 22:40 aldera, eta hainbat lekukok ikusi zuten. Haiek eman zioten abisu Poliziari.
Hain justu, «herritarrek izandako jarrera» goraipatu du Legorretako Udalak. Udaleko bi taldeek adierazpen bat izenpetu dute: erasoa jasandako emakumeari babesa agertu diote, eta gogora ekarri dute bart gaueko erasoa ez dela «kasu isolatu gisa hartu beharrekoa», egiturazko arazoa baizik. «Guzti-guztien zeregina da indarkeria horri aurre egitea. Erakundeena, haien lana baita indarkeria hori saihesteko bideak jartzea, prebentzio lana egitea, eta biktimak babestea. Eta baita herritarrena ere: isilik ez geratuz, erasotzaileen jarduna salatuz, eta biktimak errespetatuz eta zainduz».
Legorretako talde feministak protesta antolatu du arratsalderako, eta udalak bat egin du deialdiarekin: 19:30ean, plazan. Gipuzkoako Foru Aldundiak bat egin du deialdiarekin.
