Emakume bati pistolarekin mehatxu egin diola-eta gizon bat atxilotu dute Portugaleten

Ertzaintzak 36 urteko gizonezko bat atxilotu zuen atzo Portugaleten, emakumezko bati autobus batean pistolarekin mehatxu egin ziola egotzita.

Eusko Jaurlaritzako Herrizaingo Sailak esan duenez, Bizkaibusen Gallarta-Santurtzi bidean izan zen gertaera, Portugalete parean zihoazela. Gizonezkoak, mehatxua eginda, ibilgailutik jaitsiarazi zuen emakumezkoa, betiere Jaurlaritzaren arabera. Biktima bere bikotekidearekin zihoan autobusean.

Emakumezkoak gero parte sartu zuen ertzain etxean, eta poliziek Portugaleten bertan atzeman zuten ustezko erasotzailea. Ertzaintzak dio atxilotuak aurrekari asko dituela.