Emakume bati sexu erasoa egiten ahalegindu izana salatu dute Getxon

Getxoko Itzubaltzeta auzoko emakume batzordeak emakume batek sexu-eraso ahalegina jasan izana salatu du. Azaldu dutenez, Errekagane kalean saiatu ziren emakumeari erasotzen. Hura etxera zihoan, eta gizon bat jarraitzen hasi zitzaion. Emakumeak, ezkutatu, eta ihes egitea lortu zuen. Batzordeak jakinarazi duenez, gizonak andrea iraindu zuen ihes egiten zuen bitartean. Gertaera salatzeko, manifestaziora deitu dute biharko. Santa Eugenia plazatik abiatuko da protesta, 20:00etan. Horrez gain, gaur, 17:45ean, sanferminetan ustez bortxatu dituzten hiru emakumeen kasuak salatzeko, elkarretaratzea egingo du Iruñeko Peñen Federazioak. Amaia kalean izango da protesta.