Arnegin (Nafarroa Beherea), emakume batek bere bikotekide ohia harrapatu zuen autoarekin herenegun. Atzo zabaldu zen gizonezkoa zela autoaren gidaria, baina okerra zen informazio hori, gaur baieztatu dutenez. Astelehen arratsaldeko 7:45ean gertatu zen ezbeharra, 40 urteko biktima lanetik etxeruntz zihoanean.
Autoaren azpian harrapatuta geratu zen gizona, eta larrialdi zerbitzuak iritsi baino lehen hainbat herritarrek altxa zuten autoa zauritua haren azpitik ateratzeko. Larrialdi zerbitzuek ahalik eta azkarren eraman zuten Irungo (Gipuzkoa) erietxera, helikopteroan.
Dirudienez, Hegoaldean bizi dira biak. Gidaria atxilotu egin dute, eta Donibane Garaziko komisarian dago. Ustez, nahita harrapatu zuen 40 urteko gizona, eta hilketa saiakera egozten diote. Duela hilabete gutxi banandu ziren.
