Emakumeei eraso dietelakoan, bi gizon atzeman dituzte

Bi gizon atxilotu zituzten atzo goizean Gasteizen eta Bilbon, euren bikotekideei edo bikotekide ohiei eraso egin zietelakoan. Bilboko Udaltzaingoak 22 urteko gizon bat atzeman zuen atzo goizean, bikotekideari eraso egin ziolakoan. Kalean, Kirikiño etorbidean, gertatu zen erasoa, 08:00etan. Bilboko udaltzainen arabera, gizonak lurrera bota zuen andrea, eta aurpegian behin eta berriz jotzen hasi zitzaion. Inguruan paseoan zihoan beste gizon batek ikusi zuen erasoa, eta geldiarazi egin zuen ustezko erasotzailea. Udaltzainek atxilotu egin zuten gizona.

Gasteizen, etxebizitza batean gertatu zen ustezko erasoa. Eusko Jaurlaritzako Herrizaingo Sailak berri eman duenez, Ertzaintzak 41 urteko gizonezko bat atzeman zuen, bikote ohiari eraso egin eta gela batean itxi zuelako. Andreak gelako leiho batetik laguntza eskatu zion kalean ikusi zuen pertsona bati, eta hark eman zien abisu ertzainei. Gizona atzeman zuen Ertzaintzak, eta andrea erietxera eraman zuten, eskuetan eta besoetan zauriak zituelako.