Emakundek gaur jakinarazi duenez, 2011ko Berdintasun Saria Hondarribiko eta Irungo alarde mistoek jasoko dute, epaimahaikideek zehaztu dutenez, "jaietan emakumeek berdintasunean parte hartzeko duten eskubidearen alde egindako lanagatik". Hondarribiko eta Irungo alardeek hamabost urte daramatzate emakumeek parte hartzeko duten eskubidea aldarrikatzen, mugarriz mugarri.
Azken urteetan ez bezala, Maria Silvestre Emakundeko zuzendaria joan den irailean ez zen izan Hondarribian, alarde mistoari babesa ematen. Deigarria izan zen, baina are deigarriagoa izan zen Herrizaingo Sailak ibilbidea aldatzeko erabilitako argudioak ontzat eman izana; batez ere, kontuan hartuta haren zeregin nagusia emakumeen eskubideen alde egitea eta berdintasuna sustatzea dela.
Aresen neurriak bere egin zituen Emakundek
Iaz Eusko Jaurlaritzak Hondarribiko alarde mistoaren ibilbidea aldarazi zuen Herrizaingo Sailaren bidez, segurtasun neurriak argudiaturik. Emakundek orduko horretan bere egin zituen Rodolfo Ares Barne sailburuak emandako argudioak. Herrizaingo Sailak entseguetan San Pedro kalea zeharkatzea debekatu zien alarde mistokoei, eta alarde egunean Gernikako Arbola parke ingurutik igarotzea ere bai.
Hondarribiko Udaltzaingoak 2007an egin zuen txosten batean oinarritu zen Ares. Erabakiak, ordea, kritika asko eragin zituen. Bilgune Feministak salatu zuen alarde mistoaren ibilbidea aldatzeko argudioak "aitzakia" zirela. Jaizkibel konpainia mistoak helegitea jarri zuen erabakiaren kontra, eta neurria bidegabea zela argudiatu. EAEko Auzitegi Nagusiak, ordea, aldaketa baimendu zuen.
Sostengu zabala eta plastiko beltzak
Jaizkibelek EAJren eta PSE-EEren jarrera "atzerakoia" kritikatu zuen orduan. Hori ikusirik, arduraz jokatzeko eskatu zien politikariei, eta "behingoz" Berdintasun Legea bete zezatela. Bilgune Feminista, Bildu eta Aralar ibilbide aldaketaren aurka azaldu ziren.
Helegitea berriro jarri bazuten ere, azkenean Jaizkibelek bete egin behar izan zuen Herrizaingo Sailaren debekua, ertzainen zaintzapean. Sostengu zabala jaso zuten, baina plastiko beltzak agertu ziren berriro Hondarribiko kaleetan. Jaizkibel konpainiakoek eserialdia egin zuten Herrizaingo Sailaren neurrien aurka protesta egiteko.
