Enaitz Iriondoren familiak Estrasburgora jo du

Enaitz Iriondo auto batek harrapatuta hil zen gaztearen familiak Estrasburgoko Giza Eskubideen Auzitegian salaketa aurkeztu du. 17 urte zituela, Castañaresko (Espainia) kanpinera bizikletan itzultzen ari zela harrapatu zuen autoak Iriondo, eta bi urte beranduago gidariak kalteordainak eskatu zizkion familiari ezbeharrak bere autoan eragin zituen kalteengatik.

Gidaria libre eta kargurik gabe dago, eta ez du epaiketarik eduki. Espainiako Auzitegi Konstituzionaleraino iritsi da familia, baina horrek kasua zabaltzeari uko egin eta Europara jo du.

Enaitzen ama Rosa Maria Trinidadek semea harrapatu eta hiltzeagatik gidaria epaitzea nahi du. "Gidariaren eta justiziaren biktima sentitzen naiz", esan du gaur goizean, Bilbon egin duen prentsaurrekoan.

Kasua 27 egunetan eta Guardia Zibilaren argitze agiria jaso gabe artxibatu zela salatu du Jose Perez Tirado Stop Accidentes elkarteko abokatuak. Gainera, aseguru etxeek hitzartu zuten 33.000 euroko kalteordaina txikiegia dela azpimarratu du.

Enaitz Iriondo Durangokoa zen (Bizkaia) eta 2004ko abuztuaren 26an hil zen. Bi urte beranduago, gidariak familiari hogei mila euro eskatu zizkion: hamalau mila ezbeharrak autoan eragin zituen kalteak konpontzeko eta beste sei mila euro autoa konpontzen zegoela lantokira joateko erabili zuen autoaren alokairuagatik.