Jakina zen Goiak, Urkolak, Apraizeketa IDOM enpresako teknikari batek Bidegi auziko epaiketan lekuko gisa deklaratu behar zutela. Eguna falta zen jakiteko, eta gaur jakin da: irailaren 13an deklaratuko dute, ostiralez, Azpeitiko 2. instrukzio auzitegian.
AP-1eko obren inguruan deklaratu beharko dute, egin gabeko lanengatik ordaindu zuten edo ez argitzeko asmoz. Auzitegiak hasieran ez zuen onartu haiek lekuko gisara deklaratzera deitzerik, baina, helegite bat tarteko, haien deklarazioa beharrezkoa dela ebatzi zuen Gipuzkoako Lurralde Auzitegiak, "kereilaren aztergaiaren gainean eztabaidatu eta erabakitzeko bilera batean parte hartu zutelako". Zehazki, 2011ko urtarrilaren 24an Gipuzkoako eta Arabako diputazioek osatutako Batzorde Mistoaren bilera batekin lotuta dago Goiaren zitazioa; berak egin baitzuen batzordeko buru.
