Alberto Frias Araba Garoñarik Gabe plataformako bozeramaileak adierazi duenez, Iberdrolak "bizkarra eman dio" Garoñako zentral nuklearraren (Burgos, Espania) irekieraren aurka agertu den "gehiengo" bati, eta salatu du konpainiak, Edesarekin batera, 2031. urtera arte zentrala irekitzeko eskaera egin duela.
Friasen arabera, Iberdrolaren erabakiak "arriskuan" jartzen ditu zentral nuklearraren inguruan bizi direnen "segurtasuna eta etorkizuna", eta Araba ezin da horren aurrean "hotz" geratu. Hori dela eta, Garoñari "lotuta" ez dauden energia hornitzaileen alde egiteko deia egin die herritarrei, eta energia berriztagarriak aukera ditzatela.
Plataformak elkarretaratzera deitu du larunbaterako Gasteizen, Andre Mari Zuriaren plazan, 12:00etan. Mosaiko bat osatuko dute, eta, horrela, hasiera emango diote Garoña ez Iberdrola ere ez kanpainari. Ondoren, Iberdrolak Cercas Bajas kalean duen egoitzaraino giza kate bat osatuko dute. Kanpainarekin Arabako herritarren "gehiengoak" Garoñaren irekieraren aurka duen jarrera bistarazi nahi du plataformak.
