Ostegunean hasiko da Espainiako Auzitegi Nazionalean D3M plataformaren eta Askatasuna alderdi politikoaren aurkako epaiketa, eta auzipetuek oraindik ez dakite zein izango diren epaimahaiburua eta beste epaileak. Auzitegiak joan den urtarrilean epaiketaren hasiera hitzordua finkatu ondotik, Javier Gomez Bermudez zigor aretoko orduko presidentea zen izatekoa epaimahaiburua, baina otsailetik ez dago kargu horretan —eta auzitegiko lehen ataletik kendu egin zuten—, Espainiako Botere Judizialeko Kontseilu Nagusiak Fernando Grande Marlaska hautatu zuelako presidente. Ondorioz, Bermudez behintzat ez da izango D3M-Askatasuna epaiketako mahaiko burua, eta defentsak beste epaileen berri ere ez du.
Grande Marlaskak (Bilbo, 1962) apirilaren 16an hartu zuen zigor salako presidente kargua, eta sarrera hitzaldian "ETAren delituak" preskribatzearen aurka azaldu zen. 2006an iritsi zen Auzitegi Nazionalera eta ordutik, instrukzio epaile gisa, hainbat polizia operazio agindu ditu.
Egunkaria-ren eta Udalbiltzaren aurkako epaiketetan Bermudez izan zen epaimahaiburua, eta bietan absoluzioa eman zuen.
D3M-Askatasuneko auzipetuek salatu dute "indefentsio" egoeran daudela eta jakinarazi dute defentsa abokatuek aurkeztutako 64 lekukoetatik sei baino ez dizkietela onartu. Aldiz, Fiskaltzari guztiak onartu dizkiote —denak ere guardia zibilak eta poliziak dira—.
Saioak maiatzaren 18ra artean, San Fernando de Henaresen
Ostiralean izango da epaiketako bigarren saioa, eta maiatzaren 7, 8, 9, 17 eta 18an hurrengoak. Saio denak San Fernando de Henaresen izango dira, Madrildik hamabost kilometrora. Hamahiru lagun daude auzipetuta, Eusko Legebiltzarrerako 2009ko hauteskundeetara begira ETAren agindupean aritzea egotzita. Zazpi eta bederatzi urteko zigorrak eskatu dizkiete.
"Hautagaitzak aurkezteagatik izango gara epaituak. Hori da gure delitua: euskal herritarrei hauteskunde eskaintza abertzale eta ezkerrekoa aurkeztea. Akusazioa oso bestelakoa da: ETAko kide edo kolaboratzaileak izatea. Oinarririk gabeko akusazioa", esan dute auzipetuek gaur, Bilbon.
Ostegunean auziaren kontrako elkarretaratzeak izango dira herrietan, eta larunbatean manifestazioa Bilbon (Casilla, 17:30). Bietan parte hartzeko eskatu dute auzipetuek. "Salbuespen neurrian aurrean indarrak bildu" beharra dagoela azpimarratu dute.
2009ko urtarrilean egin zuten D3Mren aurkako polizia operazioa, Baltasar Garzon Auzitegi Nazionaleko epaileak aginduta. Plataforma legezko zen artean, baina laster utzi zuten legez kanpo, baita Askatasuna ere. Hauteskundeak igaro zirenean askatu zituzten atxilotuak.
