Epaileak balekotzat jo ditu eskola jangeletako greban agindutako gutxienekoak

Arabako, Bizkaiko eta Gipuzkoako ikastetxe publikoetako jangeletan iazko martxoan egindako lanuztean ezarritako gutxieneko zerbitzuak baliozko jo ditu epaileak. Haur Hezkuntza osoko ikasleei eta garraioa erabiltzen dutenei behintzat zerbitzua emateko agindu zuen Eusko Jaurlaritzak. Erabakiaren aurka helegitea jarri zuten sindikatuek, baina EAEko Justizia Auzitegi Nagusiak ez du bidezkotzat jo. Jaurlaritzak eman du epaiaren berri. Haren arabera, epaileak adierazi du Gasteizko gobernuak egoki egin zuela gutxienekoen kalkulua. Sindikatuek esan zuten langileen %85ek egin zutela greba.