Igande goizaldean atzeman zituen Guardia Zibilak Liher Bilbao, Iker Hernández, Ibon Santamaria eta Eguren bera, ustez telefono errepikagailu bati eraso egitera zihoazenean. Bilboko La Salveko kuartelera eraman zituzten laurak, eta ordu gutxira artatu zuten Eguren Basurtun. Ospitaletik kuartelera eraman zuten berriro ere.
Lau atxilotuek gaur deklaratu dute Espainiako Auzitegi Nazionaleko Santiago Pedraz epailearen aurrean, eta bermepean aske utzi ditu laurak. Sute bat piztu nahi izatea epaituko duela azaldu du epaileak autoan. Hala ere, ezin izango dute Espainiatik atera, eta astelehenero joan beharko dute gertuen duten epaitegira. Polizia iturrien arabera, A-68 errepidean dagoen telefono errepikagailu bati su eman nahi zioten gazteek. Atzo iluntzean ehunka pertsona elkartu ziren Otxarkoagatik Santutxura bitarteko manifestazio batean, atxiloketen kontra protesta egiteko. Gaurko ere elkarretaratzera deitu dute, 20:00etan Santutxun.
