EPPK-k sinatzaileekin batu nahi du oztopoen gainetik

Atzoko ekitaldian sinatzaileen artean agertu ez bazen ere, Gernikako Akordioko kideekin elkarlana egin nahi du EPPK Euskal Preso Politikoen Kolektiboak. Hala jakinarazi du birritan. Atzo bertan BERRIA egunkariak argitaratutako gutunean honela zioten: «Ea bada, oztopo guztien gainetik eskatu izan dizuegun harremana berehala abiatzen dugun». EPPK-k sinatzaileei zuzendutako gutun hori eskertu egin zuten atzoko ekitaldian bildutakoek. Izan ere, EPPKren asmoa argia da: «Elkarren berri izan, dinamika bat sortu eta jarrera bateratu eta eraginkor bati ekin». Elkarlanerako prestutasuna are argiago ere erakutsi zuen: «Pozik, besoak zabalik eta bidea elkarrekin egiteko prest».