Duela bost urte sortu zen Equo alderdiaren adarra EAEn, eta, harrezkero, Araban, Bizkaian eta Gipuzkoan Equo Euskadi izena izan du. Orain, ordea, Equo Berdeak izena hartu du talde ekologistak, hain zuzen, azaldu dutenez, ingurumenaren defentsaren erreferentzia indartzeko.
Maiatzaren 20an egin zuen Equok Barakaldon (Bizkaia) bigarren batzarra, eta gehiengo handiz erabaki zuen izena aldatzea. Ohar batean azaldu dutenez, Berdeak hitzak bildu egiten ditu alderdiak indartu nahi dituen bi kontzeptuak: ekologismoa eta euskara. Gaineratu dute euskara erabilita izenak "Euskadiri" egiten diola erreferentzia, eta izen aldaketarekin "elebitasun aktiboa" bultzatzen dutela.
Izen aldaketak alderdiarengan eragin positiboa izango duela nabermendu du Equok. Azpimarratu du 1992an sortu zen Berdeak alderdi ekologista berreskuratu dutela. Alderdi hori Espainiako Los Verdes konfederekuntzan egon zen sartuta, 1995etik 2011ra. Azken urte horretan mugimendu horrek Equo alderdia sortu zuen.
