Kataluniako CCOO eta UGT sindikatuek bat egin dute gaur erabakitzeko eskubidearen alde, Omnium Cultural erakundearekin batera. Lan mundua erabakitzeko eskubidearen alde izeneko ekitaldiaren barnean eman dute horren berri hirurek.
Josep Maria Alvarez Kataluniako UGTren idazkari nagusiak hala esan du: "Bada garaia batzuek uler dezaten erabakitzeko eskubidea aspalditik datorrela eta ez dela egun bateko lorea: geratzeko etorri da". Are gehiago, herritarrek euren etorkizuna erabakitzeak ez duela inor "beldurtu" behar.
Jose Maria Gallego CCOOko idazkari nagusiak ekitaldia baino lehen esan dio prentsari badirela desberdintasunak gaiarekiko sindikatu bereko Espainiako eta Kataluniako delegazioen artean. Baina euren "konpromisoa" agertu nahi izan du, eta "eztabaida sozialaren garrantzia" azpimarratu.
